अभ्यास
कक्षा १२ नेपाली
पाठ ४ : व्यावसायिक पत्र
शब्दभण्डार
१. शब्द र अर्थको जोडा मिलाउनुहोस् :
| शब्द | अर्थ |
| प्रबन्ध | बन्दोबस्त, चाँजोपाँजो |
| अवगत | जानेको वा बुझेको |
| दीर्घकालीन | लामो समय |
| सङ्कलित | बटुलिएको |
| वितरण | बाँडफाँड |
| सहकार्य | दुई वा दुईभन्दा बढी व्यक्ति वा संस्थाले मिलेर गरिने काम |
| प्रस्ताव | कुनै कामको आरम्भ वा सम्पादनका लागि प्रस्तुत गरिएको विचार |
| यथाशीघ्र | जतिसक्दो चाँडो |
२. दिइएका शब्दको विपरीतार्थक शब्द लेख्नुहोस् :
| शब्द | विपरीतार्थी शब्द |
| हार | जित |
| दाहिने | देब्रे |
| रुनु | हाँस्नु |
| आफ्नो | अरूको |
| दिन | रात |
| आय | व्यय |
| सक्कली | नक्कली |
| निराशा | आशा |
| प्रतिकूल | अनुकूल |
| जस | अपजस |
| प्रेम | घृणा |
| आकर्षण | विकर्षण |
| जटिल | सरल |
| सबल | दुर्बल |
| सापेक्ष | निरपेक्ष |
| हर्ष | विस्मात् |
| सपना | विपना |
| अनावश्यक | आवश्यक |
३. तलका शब्दको लघुतावाचक शब्द लेख्नुहोस् :
| शब्द | लघुतावाचक शब्द |
| किरो | किरी |
| कोदालो | कोदाली |
| गाग्रो | गाग्री |
| चिम्टा | चिम्टी |
| चरो | चरी |
| थाल | थाली |
| ठेको | ठेकी |
| पुस्तक | पुस्तिका |
| रोटी | टुक्रा |
| सुन्तला | केस्रो |
| भात | सितो |
| पराल | त्यान्द्रो |
| पानी | थोपो |
| फूल | पत्र/दल |
| केरा | कोसो |
बोध र अभिव्यक्ति
२. पाठमा उल्लेख भएअनुसार ज्वालामाई उपभोग्य वस्तु सङ्कलन तथा वितरण कम्पनी कोहलपुर, बाँकेले कर्नाली उत्पादन तथा वितरण केन्द्र, चिसापानी, कैलालीलाई मिति २०७७/१२/२५ मा लेखेको पत्र कस्तो हुनसक्छ, अनुमान गरी लेख्नुहोस् ।
ज्वालामाई उपभोग्य वस्तु सङ्कलन तथा वितरण कम्पनी
कोहलपुर, बाँके
मिति : २०७७/१२/२५
प. स. : ०७७/०७८
च. नं. : १६
श्रीमान् प्रबन्ध निर्देशक,
कर्नाली उत्पादन तथा वितरण केन्द्र,
चिसापानी, कैलाली ।
विषय : आपूर्ति सम्झौता एवं सहकार्य सम्बन्धमा ।
महोदय,
उपर्युक्त विषयका सम्बन्धमा यस ज्वालामाई उपभोग्य वस्तु सङ्कलन तथा वितरण कम्पनीले विगत दुई दशकदेखि विभिन्न कम्पनीद्वारा उत्पादित दैनिक उपभोग्य सामग्रीहरू एवं विभिन्न वस्तुहरू सङ्कलन गरी छिटो छरितो एवं सहज र प्रभावकारी रूपमा थोक तथा खुद्रा बिक्री वितरण गर्दै आइरहेको तथ्य तपाईंलाई पनि अवगत नै छ होला । हाम्रो सेवा, सुविधा अनि प्रभावकारी रूपमा गरिँदै आएको वस्तु बिक्री वितरण कार्यबाट प्रभावित भई उपभोक्ताहरूको माग दिनप्रतिदिन बढ्दै गएकाले त्यस कम्पनीबाट उत्पादित अर्गानिक खाद्यपदार्थ एवं विभिन्न उपभोग्य वस्तुहरूको बिक्री वितरण गर्नका लागि हाम्रो कम्पनी इच्छुक रहेको अवगत गराउँदै दुई कम्पनीका बिचमा व्यापारिक सहकार्य गर्ने प्रस्ताव राख्दछौँ ।
दुई कम्पनीका बिचमा आपूर्ति सम्झौता एवं सहकार्यको सम्बन्धलाई सुमधुर बनाउनका लागि यथाशीघ्र कम्पनीले पहल गर्ने छ भन्ने अपेक्षा राख्दै त्यस कम्पनीबाट उपलब्ध हुने उत्पादित एवं सङ्कलित वस्तुहरूको विस्तृत विवरण र मूल्यसूचीसमेत उपलब्ध गराई सहयोग गरिदिनुहुन कम्पनी हार्दिक अनुरोध गर्दछ । सहयोगका लागि धन्यवाद !
भवदीय,
(हस्ताक्षर)
नगेन्द्र चौधरी
कम्पनी प्रमुख
खामको नमुना
| प्रेषक | प्रापक |
|
ज्वालामाई उपभोग्य वस्तु सङ्कलन तथा वितरण कम्पनी
कोहलपुर–३, बाँके
|
श्रीमान् प्रबन्ध निर्देशक,
कर्नाली उत्पादन तथा वितरण केन्द्र
चिसापानी–२, कैलाली ।
|
३. हालसालै प्रकाशित पुस्तक पठाइदिन भनी तपाईंको घरनजिकै रहेको पुस्तक पसलले नेपाल प्रज्ञा प्रतिष्ठान, काठमाडौँलाई लेख्ने पत्रको नमुना तयार पार्नुहोस् ।
गोरखा पुस्तक पसल
गोरखा नगरपालिका–४, गोरखा
गण्डकी प्रदेश, नेपाल ।
मिति : २०८३/०५/११
प. स. : ०८३/०८४
च. नं. : ११
श्रीमान् प्रबन्ध निर्देशक,
नेपाल प्रज्ञा प्रतिष्ठान,
कमलादी, काठमाडौँ ।
विषय : सन्दर्भ पुस्तकहरू उपलब्ध गराइदिने सम्बन्धमा ।
महोदय,
उपर्युक्त विषयका सम्बन्धमा यस गोरखा पुस्तक पसलले विगत एक दशकदेखि नेपाल प्रज्ञा प्रतिष्ठानबाट प्रकाशित पुस्तकहरू बिक्री वितरण गर्दै आइरहेको कुरा यहाँलाई अवगत नै छ । प्रतिष्ठानबाट प्रकाशित हुने समसामयिक सान्दर्भिक पुस्तकहरू यस क्षेत्रका भाषा, साहित्य र संस्कृतिलाई माया गर्ने पाठकहरूका बिचमा निकै नै लोकप्रिय एवं रुचिकर बन्ने गरेको हुनाले पाठक वर्गको अत्यधिक मागलाई मध्यनजर राख्दै नेपाल प्रज्ञा प्रतिष्ठानबाट हालसालै प्रकाशित सन्दर्भ पुस्तकहरू तपसिलमा माग गरिएको विवरणअनुसार भरपर्दो यातायात सेवाबाट यथाशीघ्र पठाइदिनुहुन हार्दिक अनुरोध गर्दछु :
| क्र.सं. | पुस्तकको नाम | लेखक | प्रति |
| १ | प्रज्ञा नेपाली लोककथा | डा. देवी नेपाल | १००० |
| २ | प्रज्ञा संस्कृति कोश | विष्णु प्रभात | ५०० |
| ३ | गोर्खाली युद्धबन्दीका लोकभाका र कथा | डा. अलका आत्रेय चूडाल | १००० |
| ४ | नेपाली दलित साहित्य लेखनको इतिहास | रणेन्द्र बराली | १००० |
| ५ | समकालीन नेपाली कथाका वैचारिकता | डा. रजनी ढकाल | १००० |
| ६ | नेपालमा बुद्ध धर्म | भुवनलाल प्रधान | १००० |
| ७ | नेपाली बृहत् शब्दकोश | ने. रा. प्र. प्र. | ५०० |
| जम्मा | ६,००० प्रति |
उल्लिखित पुस्तकहरूको भुक्तानीका लागि त्यस प्रतिष्ठानको नाममा रहेको नेपाल बैङ्कको खाता नं. १०००००००००५५५ मा पेस्की स्वरूप रू. ५०,००० (अक्षरेपी पचास हजार रूपैयाँ मात्र) जम्मा गरेको बैङ्क भौचर यसै पत्रसाथ पठाएको छु । बाँकी रकम पुस्तकहरूका साथै बिल प्राप्त हुनासाथ भुक्तानी गरिने व्यहोरा अनुरोध गर्दछु । सहयोगका लागि धन्यवाद !
भवदीय,
(हस्ताक्षर)
प्रो. रामप्रसाद अर्याल
खामको नमुना
| प्रेषक | प्रापक |
|
गोरखा पुस्तक पसल
गोरखा न.पा.–४, गोरखा
गण्डकी प्रदेश, नेपाल ।
|
श्रीमान् प्रबन्ध निर्देशक,
नेपाल प्रज्ञा प्रतिष्ठान,
कमलादी, काठमाडौँ ।
|
५. दिइएको कार्यालयीय चिठी पढ्नुहोस् र त्यसको प्रत्युत्तर लेख्नुहोस् :
श्री नेचासल्यान गाउँपालिका
सोलुखुम्बु ।
मिति : २०७८/०२/१५
प. स. : ०७७/०७८
च. नं. : ७०/०७८
श्रीमान् महानिर्देशक,
पाठ्यक्रम विकास केन्द्र,
सानोठिमी, भक्तपुर ।
विषय : जानकारी सम्बन्धमा ।
महोदय,
मिति २०७८/०२/०७ मा प्राप्त पत्रअनुसार, पाठ्यक्रम विकास केन्द्र र स्थानीय तहको संयुक्त पहलमा सञ्चालित पाठ्यक्रम र पाठ्यपुस्तकसम्बन्धी तालिम, गोष्ठी तथा अभिमुखीकरण कार्यक्रमले विभिन्न पालिकाहरूको शैक्षिक गुणस्तरमा उल्लेखनीय सुधार ल्याएको जानकारी पाउँदा हामीलाई निकै खुसी लागेको छ।
सोही सफलताबाट प्रेरित भई, हाम्रो सोलुखुम्बुस्थित नेचासल्यान गाउँपालिकामा समेत यस्तै प्रकृतिका कार्यक्रमहरू आयोजना गरेर यहाँको शिक्षण सिकाइलाई थप प्रभावकारी बनाउन हामी पूर्ण रूपमा उत्साहित छौँ। यसै सन्दर्भमा, हाम्रो गाउँपालिकाअन्तर्गतका ३५ वटा सामुदायिक विद्यालयका झन्डै ३०० जना शिक्षकहरूलाई सहभागी गराई पाठ्यक्रम तथा पाठ्यपुस्तकसम्बन्धी अन्तरक्रिया र अभिमुखीकरण कार्यक्रम सञ्चालन गर्ने भनी गाउँ कार्यपालिकाको बैठकले निर्णय गरिसकेको व्यहोरा यहाँलाई अवगत गराउन चाहन्छौँ।
यस कार्यक्रमको आवश्यक लागत अनुमान र विस्तृत कार्ययोजना निर्माण भएपश्चात् यहाँहरूबाट हामीलाई जानकारी प्राप्त हुनेछ भन्ने पूर्ण विश्वास लिएका छौँ। सकारात्मक सहयोगको अपेक्षासहित मुरीमुरी धन्यवाद !
भवदीय,
(हस्ताक्षर)
अध्यक्ष
नेचासल्यान गाउँपालिका
७. दिइएको भरपाईको नमुना हेर्नुहोस् र नेपाल प्रज्ञा प्रतिष्ठानबाट कालिका पुस्तकालय, रसुवालाई उपहारस्वरूप प्रदान गरिएको बृहत् नेपाली शब्दकोश (दुई प्रति) त्यस पुस्तकालयका प्रमुखले बुझिलिएको भरपाईको नमुना तयार पार्नुहोस् :
भरपाई
नेपाली भाषाको विकास एवं प्रवर्द्धन गर्ने उद्देश्यका साथ, रसुवा जिल्लाका भाषा अनुरागीहरूलाई भाषिक शुद्धता कायम गर्न र शब्दको अर्थ बुझ्न सहज होस् भनी नेपाल प्रज्ञा प्रतिष्ठानद्वारा कालिका पुस्तकालय, रसुवालाई उपहारका रूपमा उपलब्ध गराइएको ‘बृहत् नेपाली शब्दकोश’ (दुई प्रति) प्राप्त भएकोले तपसिल बमोजिम बुझिलिएको भरपाई गरिदिएको छु :
| क्र. सं. | बुझ्नेको नाम, थर | पद | ठेगाना | हस्ताक्षर |
| १ | सागरमणि अर्याल | पुस्तकालय प्रमुख | रसुवा, धुन्चे | (हस्ताक्षर) |
मिति : २०८३ कात्तिक १३ गते शुक्रबार
८. दिइएको तमसुकको नमुना पढी तपाईंको आफ्नो स्थायी ठेगानाको कुनै एक व्यक्तिले त्यहीँको अर्को व्यक्तिसँग ऋण लिएको व्यहोरा खुलाई एउटा तमसुकको नमुना लेख्नुहोस् :
तमसुक
लिखितम् गोरखा जिल्ला गोरखा नगरपालिका वडा नम्बर ९, लक्ष्मीबजार बस्ने श्यामप्रसादको नाति, रामप्रसादको छोरा वर्ष ४० को म हरिप्रसाद शर्माले आफ्नो घरखर्च गर्न भनी ऐजन जिल्ला, ऐजन नगरपालिका, वडा नम्बर ९, लक्ष्मीबजार बस्ने श्री कपिलबाबु थापाको नाति, मदनबाबु थापाको छोरा वर्ष ४० को तपाईं राजेशबाबु थापाबाट रू. २,००,०००।– (अक्षरेपी दुई लाख रूपैयाँ मात्र) आजैका मितिमा ऋण सापटी स्वरूप लिएको छु । यस रकमको वार्षिक पन्ध्र प्रतिशतका दरले ब्याज बुझाउने छु र पाँच वर्षभित्रमा सम्पूर्ण सावाँ ब्याज चुक्ता गरिसक्ने छु । यदि यस कबोलअनुसार नबुझाएमा मेरो जायजेथा, घरजग्गाबाट कानुनबमोजिम असुल गरिलिन मेरो मन्जुरी छ । यो तमसुक मेरो राजीखुसीसाथ गरेको हुँ । यहाँ लेखिएको व्यहोरा साँचो हो । यदि झुठा ठहरे कानुनबमोजिम सहने बुझाउने छु । साक्षी किनारामा सदर । मुकाम साहुको घर आँगन ।
इति संवत् २०७९ साल असोज महिना २४ गते रोज २ बार शुभम् ।
साक्षी :
१. गोरखा जिल्ला गो.न.पा. वडा नं. ९ बस्ने वर्ष ४५ को सहदेव बस्न्यात
२. ऐ. जिल्ला ऐ. नगरपालिका वडा नं. ९ बस्ने धनबहादुर सिर्मल
लेखक : ऐ.ऐ. वडा नं. ९ बस्ने रामबहादुर थापा
आसामीको हस्ताक्षर : (हस्ताक्षर)
औँठा छाप : (दायाँ) (बायाँ)
९. दिइएको सम्झौता पत्र/करारनामाको नमुना पढ्नुहोस् र तपाईंको विद्यालयमा पुस्तकालय भवन निर्माणका लागि विद्यालयका प्रधानाध्यापक, स्थानीय निर्माण कम्पनीका प्रमुखबिच गरिने करारनामाको नमुना लेख्नुहोस् :
सम्झौता पत्र / करारनामा
महालक्ष्मी माध्यमिक विद्यालय गोरखा नगरपालिका ९ गोरखा (यसपछि यहाँ पहिलो पक्ष भनिएको छ) र ऐजन जिल्ला, ऐजन नगरपालिका वडा नम्बर ९ निवासी श्री विष्णुबहादुर आले (यसपछि यहाँ दोस्रो पक्ष भनिएको छ) सँग तपसिलका कार्य गर्नका लागि देहायबमोजिमको सर्तको अधीनमा रहेर दोस्रो पक्षले पहिलो पक्षलाई सेवा उपलब्ध गराउन मन्जुर भई यो सम्झौता गरिएको छ । यो सम्झौताका एक-एक प्रति आपसमा बुझिलियौँ, दियौँ ।
सर्तहरू :
१. गर्नुपर्ने कामको विवरण : दोस्रो पक्षले महालक्ष्मी माध्यमिक विद्यालय, गोरखा नगरपालिका ९ गोरखामा पुस्तकालय भवन निर्माण कार्य गर्नुपर्ने छ । उक्त भवन निर्माण कार्य गोरखा नगरपालिकाबाट प्राप्त लागत र डिजाइनअनुसार गर्नुपर्ने छ ।
२. दोस्रो पक्षले प्रचलित कानुनमा व्यवस्था भएका भवन निर्माणसम्बन्धी नियमहरू पालना गर्नुपर्ने छ ।
३. भुक्तानी : पहिलो पक्षले दोस्रो पक्षलाई भवन निर्माण कार्य सम्पन्न भएपछि सम्पूर्ण कागजात नगरपालिकामा पेस गरी रकम प्राप्त भएपछि नियमबमोजिम एक महिनाभित्र रकम भुक्तानी गरिने छ ।
४. सम्झौता भङ्ग गर्न चाहेमा कम्तीमा १५ दिनको समय दिई एक पक्षले अर्को पक्षलाई लिखित रूपमा सूचना दिनुपर्ने छ ।
५. भवन निर्माण गर्दा निर्माण समितिको रोहवरमा गुणस्तरीय सामग्री प्रयोग गर्नुपर्ने छ ।
६. सम्झौताको अवधि २०७८ साल मङ्सिर १ गतेदेखि २०७९ कात्तिक मसान्तसम्म एक वर्षको हुने छ ।
| पहिलो पक्षबाट | दोस्रो पक्षको तर्फबाट |
|
दस्तखत :
नाम थर : चुडामणि काप्री
ठेगाना : गोरखा नगरपालिका ९, गोरखा
पद : प्रधानाध्यापक
कार्यालय : श्री महालक्ष्मी माध्यमिक विद्यालय
|
दस्तखत :
नाम थर : विष्णुबहादुर आले
ठेगाना : गोरखा नगरपालिका ९, गोरखा
पद : प्रबन्ध निर्देशक
कार्यालय : गोरखा निर्माण प्रा. लि.
|
रोहबर
१. वडा अध्यक्ष …………………
२. वडा सचिव …………………
(गोरखा नगरपालिका वडा नम्बर ९, वडा कार्यालय, लक्ष्मीबजार गोरखा)
इति संवत् २०७८ साल मङ्सिर १ गते ४ रोज शुभम्
१०. तपाईंको जग्गामा रहेको ढुङ्गाखानीबाट तपाईंको टोलमा सार्वजनिक शौचालय निर्माणका लागि चाहिने ढुङ्गा निकाली लैजानका लागि तपाईंले वडा कार्यालयलाई दिएको मन्जुरीनामाको नमुना लेख्नुहोस् :
श्रीमान् वडाध्यक्ष,
गोरखा नगरपालिका वडा नं. ९
लक्ष्मीबजार, गोरखा ।
विषय : मन्जुरीनामा सम्बन्धमा ।
महोदय,
उपर्युक्त सम्बन्धमा म गोरखा नगरपालिका वडा नं. ९ निवासी स्थायी बासिन्दा भएको नाताले यस वडामा सार्वजनिक शौचालयको अभाव भएको कारण सार्वजनिक स्थलहरूमा खुला दिसा–पिसाब गर्ने गरेकाले कतिपय सभा समारोह गर्ने भेला हुने स्थानहरू नै दुर्गन्धित हुँदै गएको अवस्थामा यस वडाले हाम्रो टोलमा सार्वजनिक शौचालय निर्माणका लागि ढुङ्गाको अभाव भएको तथ्यलाई मनन गर्दै मेरो जग्गामा रहेको ढुङ्गाखानीबाट हाम्रो टोलमा सार्वजनिक शौचालय निर्माणका लागि चाहिने ढुङ्गा निकाली लैजानका लागि मैले गो.न.पा. वडा नं ९ को वडा कार्यालयलाई राजीखुसीका साथ मन्जुरीनामा दिएको छु । आफ्नो टोललाई स्वच्छ, सफा एवं प्रदूषणरहित बनाउनु मेरो पनि दायित्व भएकाले म व्यक्तिगत स्वार्थबाट माथि उठी सामूहिक स्वार्थलाई सर्वोपरी ठान्दै ढुङ्गा एवं श्रमदान गर्नसमेत तत्पर रहेको जानकारी गराउँदछु । उक्त व्यहोरा साँचो हो, झुठा ठहरे कानुनबमोजिम सहुँला बुझाउँला ।
इति मिति २०७८ कात्तिक १६ गते मङ्गलबार ।
भवदीय,
सही : (हस्ताक्षर)
श्यामबहादुर के.सी.
११. दिइएको विज्ञापनको नमुना पढ्नुहोस् र नमुनामा जस्तै कुनै पदको पूर्ति तथा कुनै सामानको प्रचारप्रसारका बारेमा एक-एकवटा विज्ञापन लेख्नुहोस् :
(क) पदपूर्तिका लागि विज्ञापन
श्री महालक्ष्मी माध्यमिक विद्यालयको
शिक्षक आवश्यकतासम्बन्धी सूचना
(पहिलो पटक प्रकाशित मिति : २०७८/०६/१२)
यस विद्यालयमा रिक्त रहेको नेपाली विषयको माध्यमिक तह तृतीय श्रेणी शिक्षक पदमा खुला प्रतियोगिताद्वारा करार सेवामा शिक्षक पदपूर्ति गर्नुपर्ने भएकाले यो सूचना प्रकाशन गरिएको छ । योग्यता पुगेका नेपाली नागरिकबाट यो सूचना प्रकाशन भएको मितिले ३५ (पैँतीस) दिनभित्र दरखास्त आह्वान गरिएको छ । उक्त मितिबाट सात दिनसम्म दोब्बर दस्तुर तिरी दरखास्त दिन सकिने छ ।
दरखास्त दस्तुर रू. १०००।– (अक्षरेपी एक हजार रूपैयाँ मात्र) यस विद्यालयको राष्ट्रिय वाणिज्य बैङ्कको खाता नं. १०००००००००००२२२१ मा जम्मा गरी त्यसको सक्कल भौचर संलग्न गर्नुपर्ने छ ।
विज्ञापन नं. : २/२०७८/०७९
पद : शिक्षक
विषय : नेपाली
तह : माध्यमिक, तृतीय श्रेणी
परीक्षाको किसिम : लिखित तथा अन्तर्वार्ता
आवश्यक न्यूनतम योग्यता : सम्बन्धित विषयमा कम्तीमा स्नातक तह उत्तीर्ण
उमेर : १८ वर्ष पूरा भई ४० वर्ष ननाघेको
दरखास्त बुझाउने अन्तिम मिति : २०७८/०७/१७ गते
सम्पर्क मिति : २०७८/०७/१८ गते
परीक्षा मिति : सम्पर्क मितिका दिन तोकिने
दरखास्तका साथमा संलग्न गर्नुपर्ने कागजातहरू :
१. शैक्षिक योग्यताका प्रमाणपत्रहरूको प्रतिलिपि
२. नेपाली नागरिकताको प्रमाणपत्रको प्रतिलिपि
३. शिक्षण अनुमतिपत्रको प्रतिलिपि
४. अनुभवपत्रको प्रतिलिपि
५. पासपोर्ट साइजको दुई प्रति फोटो
६. हस्तलिखित निवेदन
(हस्ताक्षर)
प्रधानाध्यापक
(ख) सामानको प्रचारप्रसारका लागि विज्ञापन
व्यावसायिक विज्ञापन
स्वस्थ जीवन, खुसी परिवार !
तपाईंको भान्साको साथी – “अन्नपूर्ण शुद्ध तोरीको तेल”
✔ १००% शुद्ध र प्राकृतिक ।
✔ कुनै मिसावट नभएको ।
✔ स्वास्थ्यका लागि अति लाभदायक ।
✔ आकर्षक छुटका साथ बजारमा उपलब्ध ।
आजै नजिकैको पसलबाट खरिद गर्नुहोस् !
सम्पर्क: अन्नपूर्ण तेल उद्योग, भरतपुर, चितवन ।
फोन: ०५६-५२००००
१२. नयाँ वर्षका दिन १२ कक्षाका सबै विद्यार्थी एक दिने शैक्षिक भ्रमण जाने विषयमा विद्यालयका प्रधानाध्यापकबाट जारी गरिने सूचनाको नमुना
श्री महालक्ष्मी माध्यमिक विद्यालय
गो.न.पा. ९ लक्ष्मीबजार, गोरखा ।
मिति : २०७७/१२/२५ गते
शैक्षिक भ्रमणसम्बन्धी सूचना !
नयाँ वर्ष २०७८ को शुभ अवसरमा यस विद्यालयद्वारा विद्यार्थीहरूलाई मनोरञ्जनका साथै बौद्धिक क्षितिजलाई फराकिलो बनाउने उद्देश्यका साथ विगतका वर्षहरूमा झैँ यस वर्ष पनि कक्षा १२ मा अध्ययनरत सम्पूर्ण विद्यार्थी भाइबहिनीहरूका लागि एक दिने शैक्षिक भ्रमण जाने कार्यक्रमको आयोजना गरिएको छ । उक्त कार्यक्रमलाई व्यवस्थित रूपमा सम्पन्न गर्नका लागि आवश्यक तयारी गर्नुपर्ने भएकाले सम्बन्धित विद्यार्थीहरूले तोकिएको समयमा नै सम्पर्क गरी सहजीकरण गरिदिनुहुन विद्यालय प्रशासन हार्दिक अनुरोध गर्दछ ।
सम्पर्कका लागि :
कार्यक्रम संयोजक :
फोन नं. :
प्रधानाध्यापक
नोट : सम्बन्धित विद्यार्थी भाइबहिनीहरूले चैत २८ गतेसम्म नाम दर्ता गरिसक्नुपर्ने छ ।
१३. विद्यालयमा छात्रावास भवन बनाउनका लागि जारी गरिने बोलपत्रको नमुना
श्री महालक्ष्मी माध्यमिक विद्यालय
गो.न.पा. ९, लक्ष्मीबजार, गोरखा ।
छात्रावास भवन निर्माणसम्बन्धी सिलबन्दी बोलपत्र आह्वानको सूचना !
(प्रथम पटक प्रकाशन मिति : २०७८/०७/१७ गते)
यस विद्यालयमा गोरखा नगरपालिका वडा नं. ९ द्वारा विनियोजित रकमबाट छात्रावास भवन निर्माण गर्नुपर्ने भएकाले नेपाल सरकारबाट इजाजत प्राप्त निर्माण कम्पनीले तपसिलबमोजिमको सर्तको अधीनमा रही रीतपूर्वकको बोलपत्र पेस गर्नुहुन यो सूचना प्रकाशन गरिएको छ :
१. यो सूचना प्रकाशित मितिदेखि ३० औँ दिनसम्म बोलपत्र फाराम यस विद्यालयबाट प्राप्त गर्न सकिने छ ।
२. खरिद गरिएका बोलपत्र फारामका महल स्पष्ट रूपमा भरी प्रत्येक पानामा सहीछाप गरी प्रथम पटक सूचना प्रकाशन भएको मितिदेखि ३५ औँ दिन दिनको १२ बजेभित्र यस कार्यालयमा उपस्थित भई वा बोलपत्र र आवश्यक कागजातको स्क्यान गरी अनलाइनमार्फत दर्ता गर्नुपर्ने छ ।
३. बोलपत्रका साथ सम्बन्धित व्यक्तिको नागरिकता, अद्यावधिक नवीकरण गरेको व्यवसाय दर्ताको इजाजतपत्र, कर चुक्ता गरेको कागजातका प्रमाणित प्रति पेस गर्नुपर्ने छ ।
४. बोलपत्र फारामसाथ जमानतबापतको रकम यस विद्यालयको नाममा रहेको राष्ट्रिय वाणिज्य बैङ्क खाता नम्बर १०००००००००००५५५५ मा दाखिला गरेको सक्कल भौचर पेस गर्नुपर्ने छ ।
५. प्राप्त बोलपत्र स्वीकृत गर्ने वा नगर्ने सम्पूर्ण अधिकार यस कार्यालयमा सुरक्षित रहने छ ।
६. रीत नपुगेका र म्याद नाघिआएका बोलपत्रउपर कुनै कारबाही गरिने छैन ।
७. थप जानकारीका लागि यस विद्यालयको कार्यालयमा सम्पर्क गर्न सकिने छ ।
प्रधानाध्यापक
१४. टिप्पणी र आदेश
गोरखा नगरपालिका
नगर कार्यपालिकाको कार्यालय
गो.न.पा. गोरखा ।
मिति : …………………..
टिप्पणी र आदेश
विषय : अनुगमन समिति गठन सम्बन्धमा ।
श्रीमान्,
यस नगरपालिकाबाट जारी गरेको भूमि व्यवस्थापनसम्बन्धी कार्यविधि २०७६ को जग्गा प्लटिङ गर्ने सम्बन्धमा शीर्षकको क्र.सं. ८ मा जग्गा प्लटिङका लागि अनुमति प्राप्त भई प्लटिङ कार्य सुरु भएपश्चात् मापदण्डअनुसार प्लटिङ भए/नभएको अनुगमन गर्नका लागि नगर उपप्रमुखको संयोजकत्वमा ४ सदस्यीय “अनुगमन समिति” गठन गर्ने भन्ने व्यवस्था भएबमोजिम निम्नानुसारका सदस्य रहने गरी अनुगमन समिति गठन गर्न मनासिब हुने देखी निर्णयार्थ श्रीमान्समक्ष पेस गर्दछु ।
| क्र.सं. | नाम | पद |
| १ | नगर उपप्रमुख | संयोजक |
| २ | प्रमुख प्रशासकीय अधिकृत | सदस्य |
| ३ | सम्बन्धित वडा अध्यक्ष | सदस्य |
| ४ | ई. राजनबाबु आले | सदस्य |
पेस भएबमोजिमको व्यहोरा मनासिब भएकोले निर्णयार्थ पेस गर्दछु ।
पेस गर्ने
हस्ताक्षर : ………………….
शाखा अधिकृत