सारङ्गीमा देश कविता पाठ पढ्नुहोस् ।

पाठ ८: सारङ्गीमा देश (धीरेन्द्र प्रेमर्षि)

गाउँदै आयो यो नेपाली सारङ्गीमा देश

मेची काली हिमाल पहाड तराई मधेस ।

जीवनको कथा, व्यथा, सङ्घर्षमा बाँच्छ

हाम्रै आँसु हाँसोसँग सधैं रुन्छ हाँस्छ

सिर्जनामा रम्दै अनि साधनामा जम्दै

पौरखीका पसिनाको सुवासमा नाच्छ ।

बक्खु, भाङ्ग्रा, धोती सबै भन्छ मेरै भेष

गाउँदै आयो यो नेपाली सारङ्गीमा देश ।

हिमाललाई न्यानो दिन्छ तराईको काखा

मधेसको पङ्खा बनी बस्छन् भिरपाखा

स्वाभिमानको मियोमाथि पिरतीको दियो

बाली मुस्कुराएका छन् कोटी कोटी आँखा ।

नलागोस् है कसैको नि भावनामा ठेस

गाउँदै आयो यो नेपाली सारङ्गीमा देश ।

जन्मे यहीं बुद्ध अनि भृकुटी र सीता

यही माटामा कर्मयोग सिकाउँछ गीता

ज्ञानभूमि, तपोभूमि, स्वप्नभूमि यही

गर्वसाथ गाउने गर्छ, जय धर्ती माता !

जता हेर्यो त्यतै देख्छ विशेषै विशेष

गाउँदै आयो यो नेपाली सारङ्गीमा देश ।

प्रकृक्तिले सम्झाउँछ अमर गौरव गाथा

संसारकै शिरपोस हाम्रो सगरमाथा

समृद्धिको शिखर चुम्दै जान माथि माथि

रेटिंदै छ मानो रोपी फलाउन पाथी ।

सिङ्गो धर्ती सजाउने स्वर्णिम परिवेश

गाउँदै आयो यो नेपाली सारङ्गीमा देश ।

शब्द र अर्थ (Glossary)